شجرة الزيتون
مرسل: الخميس نوفمبر 24, 2022 1:20 pm
في راهب كان حابب يكون عندو زيت. زرع شجرة زيتون وصلّى وقال لألّله:
«يا رب خلّي الدِني تشَتّي حتّى شجرة الزيتون تكبر». استجاب الله لَطلبو، وكبرت الزيتونة.
من جديد صلّى الراهب للربّ وقلّو: «زيتونتي بدها شمس، بترجّاك خلّي الشمس تشرق ع زيتونتي».
استجاب الله وشرقت الشمس وراحت الغيوم.
بعد فترة صلّى الراهب حتّى الدِني تصقّع وتقوى غصون الزيتونة وتنغرز شلوشها بالأرض، وهيك صار.
مع الإيّام كبرت الزيتونة وقويت وفرّخت وكترت وراقها، بس بعد سنة يبسِت، زعل الراهب وخَبّر رفيقو الراهب قصّة الزيتونة.
قلّو الراهب: «أنا كمان زرعت زيتونة، وكان بدّي زيت، سلّمت الزيتونة للربّ، وطلبت مِنّو يعطيها كل حاجاتها،
وهيك كبرت تحت عنايتو وبلّشت تعطي زيت».
الزوّادة بتقلّي وبتقلّك:
«الربّ يلّي بيلبِّس زنابق الحقل أجمل تيابها، وبيطعمي طيور السما، اكيد ما رح يتركنا، ورح يهتمّ فيك وفيّي».
بيكفي نسلمو كلشي بثقة …!!!