3 فخدات دجاج و تزيد حسب عدد الأشخاص
10 حبات بطاطا كبار و وسط
1 بصلة صغيرة
التتبيلة:
1 كاسة لبن يوغورت
1/2 كاسة زيت زيتون او نباتي
ملعقة كبيرة فلفل أسود
ملعقة كبيرة بابريكا (فليفة حارة بودرة)
ملعقة كبيرة ملح ناعم
ملعقة صغيرة قرفة
ملعقة صغيرة هال مطحون في حال التوفر
ملعقة صغيرة زنجبيل
ملعقتين كبار دبس بندورة (معجون)
ملعقة صغيرة دبس فليفلة (معجون)
ملعقة صغيرة صلصة بندورة
تتبيلة البطاطا:
ملعقتين كبار كاري
ملعقتين كبار بهار أصفر مشكل
ملعقة صغيرة بودرة ثوم
ملعقة صغيرة فلفل اسود
ملعقة كبيرة ملح
ملعقة كبيرة كزبرة ناشفة
ملعقة صغيرة كركم
ملعقة صغيرة بابريكا
ملعقتين كبار زيت زيتون
تنظيف الدجاج:
ملعقتين كبار خل ابيض
ملعقة ملح
ملعقتين كبار عصير ليمون
تتبيلة صوص التوم والليمون:
2 ليمونتين
1 راس ثوم
الخطوات
أولاً نطلع الدجاج من المجمدة قبل بوقت مشان يلحق يفك، بس يفك التلج شوي بنحطه بوعاء فيه ماء بارد وبنضيف عليه مكونات تنظيف الدجاج الخل والملح والليمون وبنتركهم منقوعين فيه، بنعمل ثقوب بالدجاج بالسكين عشان تتغلغل فيها مكونات التتبيلة لاحقاً.
ثانياً نتبل الدجاج بمكونات التتبيلة يلي ذكرتهم فوق كلهم مع بعضهم بالخلاط او الخفاق اليدوي وبعدين بنسكبهم فوق الدجاج بعد ما نظفناه و ننقع اقل شي ساعة وصار نظيف انا بسلخ الجلد اول شي وبعدين بحطه بالتتبيلة وبنغلف الوعاء منيح وبنتركه بالثلاجة ليلة او ٦ ساعات اقل شيء.
نقشر البطاطا ونقطعها دوائر وسط لا سميكة ولا رقيقة، ننقع البطاطا بالتتبيلة الخاصة بالبطاطا يلي عملناها فوق.
نطلع الدجاج من الثلاجة ونجيب صينية ترص فيها البطاطا اولاً وبعدين الدجاج فوقها والزايد من التتبيلة نحطها كلها فوق الدجاج، نحط ورقة زبدة على الصينية قبل وضع السوليفان الألمينيوم ونغلف الصينية بالقصدير بشكل جيد جداً ٣ طبقات.
تدخل الفرن على درجة حرارة 200 من فوق ومن تحت لمدة ساعة كاملة لحين الاستواء، نخرج الصينية بعد ان نشم رائحة الطعام ملأت المكان ونزيل القصدير ونعيد الصينية الى الفرن مع تشغيل الشواية لحتى تتشوى الدجاجة من فوق كويس، وهلأ بنعصر الليمون مع هرس الثوم مع بعض وبنسكبهم فوق الصينية او بتقدرو تضيفوهم مع الشوي بس رح يحترقو اذا عملتو هيك، والصينية صارت جاهزة ألف صحة وهنا تقدم ساخنة وتؤكل بالخبز.
